Camiño Primitivo 

O Camiño Primitivo de peregrinación a Compostela foi o empregado polos primeiros devotos, chegados do nacente reino asturiano. Trátase, polo tanto, do primeiro itinerario xacobeo, velaí a orixe da súa actual denominación.

Esta ruta foi seguida posiblemente polo rei Afonso II o Casto, dende a capital do reino ástur, en Oviedo, ata a tumba de Santiago, no primeiro terzo de século IX. Este monarca foi decisivo para confirmar como pertencentes ao apóstolo Santiago o Maior os restos aparecidos en Compostela, alén de auspiciar a fundación da primeira igrexa da nacente urbe e colaborar na organización do primitivo culto apostólico. Así mesmo, concedeu doazóns e incentivou o establecemento da primeira comunidade monástica destinada a atender as demandas do culto no altar de Santiago.

O Camiño Primitivo tivo na cidade de Oviedo o seu principal punto de orixe, pero foi seguido tamén por peregrinos doutras partes do norte de España e de Europa. Foi posiblemente un itinerario seguro e moi frecuentado ata que, xa en pleno século X, se consolida o actual Camiño Francés dende León, a nova capital do Reino.

Así e todo, a ruta ovetense a Compostela seguiu a ser unha relevante alternativa, especialmente polo valor espiritual que determinados peregrinos lle outorgaban á gran colección de reliquias da catedral de San Salvador de Oviedo e á basílica de Lugo, coa súa exposición permanente do Santísimo Sacramento.

Google Earth

O Acevo - A Pobra de Burón - Santiago (10 etapas)
O Acevo - San Xoán de Padrón - Santiago (10 etapas)