Camiño Francés 

O Camiño Francés é o itinerario xacobeo con maior tradición histórica e que goza de máis recoñecemento internacional. O seu trazado a través do norte da Península Ibérica quedou fixado a finais do século XI, grazas ao labor construtivo e de promoción de monarcas como Sancho III o Maior e Sancho Ramírez de Navarra e Aragón, así como de Afonso VI e os seus sucesores. As principais vías deste Camiño en Francia e España ficaron descritas con precisión contra o 1135 no Codex Calixtinus, libro fundamental xacobeo.

O Libro V deste códice constitúe unha auténtica guía medieval da peregrinación a Santiago. Nel especifícanse os treitos do Camiño Francés dende terras galas e infórmase polo miúdo sobre os santuarios da ruta, a hospitalidade, as xentes, a comida, as fontes, os costumes locais, etc. Todo está escrito coa síntese e claridade que precisa unha resposta práctica a unha demanda concreta: a peregrinación a Santiago.

Esta guía, atribuída ao clérigo francés Aymeric Picaud, evidencia o desexo político-relixioso por facer promoción do santuario compostelán e facilitar o acceso ata el. Cando se confecciona este libro, o Camiño Francés e as peregrinacións alcanzan o seu máximo apoxeo e, de excluírmos o momento actual, a súa maior afluencia. Santiago pasa a se converter na meta de peregrinos procedentes de todo o orbe cristián.

Co andar dos séculos e os avatares políticos e relixiosos europeos, o itinerario físico do Camiño Francés perdeu peso específico. Será a finais do século XIX cando rexurda o interese pola temática xacobea, que continúa na segunda metade do XX coa progresiva recuperación do vello itinerario, recoñecido internacionalmente como un dos símbolos históricos da unidade europea.

O Camiño Francés adquire entón un trazado preciso en Francia a través das catro vías principais xa descritas no Codex Calixtinus. Tres destas rutas (París-Tours, Vézelay-Limoges, e Le Puy-Conques) entran en España por Roncesvalles, en Navarra, mentres a cuarta (Arles-Toulouse) entra polo porto de Somport e continúa ata Jaca, en terras de Aragón. O itinerario de Roncesvalles, que cruza a cidade de Pamplona, únese co aragonés en Puente la Reina (Navarra).

Dende Puente la Reina, o Camiño Francés mantén un único itinerario que atravesa vilas e cidades do norte de España tan significativas como Estella, Logroño, Santo Domingo de la Calzada, Burgos, Castrojeriz, Frómista, Carrión de los Condes, Sahagún, León, Astorga, Ponferrada, e Villafranca del Bierzo.

O Camino Francés entra en Galicia pola bisbarra do Bierzo.

Google Earth

O Cebreiro - San Xil - Santiago (8 etapas)
O Cebreiro - Samos - Santiago (8 etapas)